Facebook ijtimoiy tarmog‘ining Marhabo Alimova ism-sharifli foydalanuvchisi “Prezident Sh.M. Mirziyoyev tarafdorlari va qo‘llash komandasi” guruhida 20-iyul kuni O‘zbekiston davlat jahon tillari universitetida yuz bergan hodisa haqida xabar qoldirgan, xabarga hodisa joyidan olingan videoyozuv ilova qilingan.

Guruhda qoldirilgan shikoyatning muallifi Xalqaro jurnalistika fakultetiga o‘qishga kirish bo‘yicha ijodiy imtihon natijalaridan qoniqmay, apellyatsiya berish istagini bildirganida, universitet va fakultet xodimlari tomonidan qarshilikka duch kelganini ma’lum qilgan.

Assalomu alaykum! Men Toshkentdagi universitetlarning birida bo‘lgan adolatsizlik haqida yozyapman. Mazkur holat yuzasidan chora ko‘rilishini xohlardim.

Biz 20-iyul kuni soat 9:30 larda ijodiy imtihon baholarini bilish uchun universitetga bordik. Baholardan qoniqmay, apellyatsiya bermoqchi edik, lekin bo‘lgan voqealarni so‘z bilan tasvirlab bera olmayman. Oxir-oqibat, menga shu universitet xodimi kuch ishlatib (qo‘llarimni qattiq qayirib, har xil haqoratli so‘zlar bilan haqoratlab), telefonimni qo‘limdan yulib oldi.

Ular hech kimdan apellyatsiya arizalarini qabul qilmayotgan edi. Lekin biz bilan sodir bo‘lgan janjaldan so‘ng, birinchi arizani 10:25 da ro‘yxatdan o‘tkazishdi. Keyin ichkaridan xona tayyorlab, ariza yozish uchun sharoit bor, deb shuni ko‘rsatishdi. Shu sharoitlarni oldindan tayyorlab qo‘yishsa va bizga insondek muomala ko‘rsatishsa bo‘lardi-ku!

Marhabo Alimova, Facebook foydalanuvchisi

Ushbu xabarga ilova qilingan videoyozuvda telefonidagi kamerani yoqqan shikoyat muallifiga qarata: “Shantaj qilmoqchimisiiz?”, ma’nosida fikr bildirganini eshitish mumkin. Video oxirida esa kimligi hozircha noma’lum bo‘lan shaxs (shikoyatchiga ko‘ra — universitet xodimi) videoga olayotgan fuqaroning telefoniga tashlanganini ko‘rish mumkin. Qayd etish joiz, butun video davomida mazkur shaxs yuzini yashirishga harakat qilgan.

Mazkur holat yuzasidan na O‘zbekiston davlat jahon tillari universiteti va na Xalqaro jurnalistika fakulteti munosabat bildirgan. Ijtimoiy tarmoq foydalanuvchilari esa ikkiga bo‘lingan. Bir guruh foydalanuvchilar universitet xodimlarining qo‘pol muomalasini tanqid qilgan.

“Hali bu meshqorinlarga navbat kelgani yo‘q. Prezidentimizning hali bular bilan shug‘ullanishga vaqtlari bo‘lgani yo‘q. Hali ko‘pchilikka imkoniyat berilgan, biroq ba’zilar bundan to‘g‘ri xulosa chiqarib ololmayapti”, — deb yozgan bir foydalanuvchi.

“Prezidentimiz aytganlaridek, ayrim domlalarning o‘zini qayta o‘qitish kerak. Nima qilayotganini, nima deyayotganini bilmay qolyapti, yog‘ bosib ketganidan. Yoshlarimizga qiyin”, — deb qo‘shimcha qilgan boshqa bir foydalanuvchi.

Ba’zi foydalanuvchilar esa videoxabar muallifi qoldirgan murojaatdagi imloviy va grammatik xatolarga ishora qilib, u (yoki unga aloqador inson)ning ijodiy imtihondan yiqilgani to‘g‘ri bo‘lganini ta’kidlagan.

Facebook’dagi guruhda qoldirilgan shikoyat matni (skrinshot)

“Arz qilishdan oldin savodingizni to‘g‘rilang”, — deb qat’iy ta’kidlagan foydalanuvchilardan biri.

“Imtihonning birinchi bosqichidan nima uchun o‘ta olmagani shu yerdan ham ma’lum. U baribir o‘qishga kira olmaydi. Jurnalistlarimiz bu qadar savodsiz bo‘lishini istamasdim”, — deb yozgan yana bir foydalanuvchi.

“Yozgan murojaatingizda xatolar juda ko‘p. Shu sababli imtihon savodli topshirilganiga katta shubham bor. Farzandingiz yaxshilab tayyorgarlik ko‘rib, keyingi yil qayta topshirsa, maqsadga muvofiq bo‘lardi”, — deb qo‘shimcha qilgan boshqa foydalanuvchi.

O‘z navbatida, shikoyat muallifini shantajda ayblaganlar ham topiladi. “To‘polon va shallaqilik qilib, hammani telefon va Facebook bilan qo‘rqitib, ishni bitirib yuradigan noinsoflar ham ko‘payib ketdi”, — deb yozgan foydalanuvchilardan biri.

“Rosa ommalashdi-da bu telefon, internet deganlari. Hojatxonagacha qo‘yildi, qoyil! Stol-stul yo‘q bo‘lsa ham, mana internetda!”, — deb kinoya qilgan boshqa foydalanuvchi.

Manba: Daryo.uz