![](/_nw/3/18653754.jpg) Muloyim va yengil xamirli rogalik oilangizning barcha yoshdagi a’zolari uchun birdek ma’qul kelishi shubhasiz. Bundan tashqari, ushbu pishiriqqa o‘z ta’bingizga qarab turli-tuman qiymalarni solishingiz mumkin. Biz esa qiyma sifatida mayizdan foydalandik.
Zarur masalliqlar:
achitqi uchun:
- 1 piyola sut
- 0,5 piyola un
- 1 osh qoshig‘ida shakar
- 2 choy qoshig‘ida quruq xamirturush
xamiri uchun:
- 1 ta tuxum
- 2 osh qoshig‘ida shakar
- 1 osh qoshig‘ida o‘simlik yog‘i
- 0,5 kg un
- 25 g margarin
qiymasi uchun:
0,5 piyola mayiz
qiyomi uchun:
- 0,5 piyola shakar
- 1 piyola suv
Tayyorlanishi:
Avval achitqini tayyorlab olamiz. Buning uchun 1 piyola sutni iliqdan ko‘ra issiqroq haroratgacha qizdirib, unga 0,5 piyola un, 1 osh qoshiq shakar va 2 choy qoshiq quruq xamirturush solamiz. Yaxshilab aralashtiramiz va idishning og‘zini yopib, sochiq bilan o‘rab, issiqroq joyga qo‘yib qo‘yamiz.
![2](http://antiqa.biz/fotka/21-1024x576.jpg)
Taxminan 15—20 daqiqadan so‘ng achitqi tayyor bo‘ladi.
![3](http://antiqa.biz/fotka/31-1024x576.jpg)
Xamirni tayyorlash uchun 1 ta tuxum, 2 osh qoshiq shakar va 1 osh qoshiq o‘simlik yog‘ini bitta idishga solib aralashtiramiz.
![4](http://antiqa.biz/fotka/41-1024x576.jpg)
Ustiga tayyor achitqini solib, yana aralashtiramiz.
![5](http://antiqa.biz/fotka/52-1024x576.jpg)
Taxminan 0,5 kg unni solib, yumshoq va qayishqoq xamir qoramiz. Uni qopqoqli idishga solib, sochiqqa o‘rab, issiq joyga taxminan 30 daqiqa qo‘yamiz.
![6](http://antiqa.biz/fotka/61-1024x576.jpg)
Xamir boshlang‘ich hajmidan taxminan ikki barobar kattalashishi kerak.
![7](http://antiqa.biz/fotka/1212.jpg)
Oshgan xamirni yoyib, ustiga eritilgan margarinni suramiz.
![8](http://antiqa.biz/fotka/111.jpg)
Xamirni dastlab uzunchoq qilib, so‘ng doira shaklida o‘raymiz. Uni yana qopqoqli idishga solib, sochiq bilan o‘rab, issiq joyga qo‘yamiz.
![9.1](http://antiqa.biz/fotka/9.1-1024x576.jpg)
![9.2](http://antiqa.biz/fotka/9.2-1024x576.jpg)
30 daqiqadan so‘ng yana ko‘tarilgan xamirni olib, yoyamiz. Va markazdan chetiga qarab uchburchak shaklida tasmalar kesib chiqamiz.
![10](http://antiqa.biz/fotka/1332.jpg)
Cho‘pidan tozalanib, suvda yaxshilab yuvilgan mayizni xamir bo‘laklariga solib chiqamiz.
![11](http://antiqa.biz/fotka/111-1024x576.jpg)
Xamirni keng qismidan ingichga tomoniga qarata o‘rab chiqamiz. O‘rash jarayonida xamirni cho‘zish lozim.
![12](http://antiqa.biz/fotka/1221.jpg)
Rogaliklarni listga joylab, 180 darajagacha qizdirilgan duxovkada taxminan 30 daqiqa davomida pishiramiz.
![13](http://antiqa.biz/fotka/13321.jpg)
Rogalik pishgunicha, shakarli qiyomni tayyorlab olamiz. Buning uchun idishga 0,5 piyola shakar va 1 piyola suv solib, sal quyilgunicha aralashtirib qaynatamiz.
![14](http://antiqa.biz/fotka/1234.jpg)
Pishiriq tayyor bo‘lgach, hali issiq paytida qiyomga botirib olamiz.
![15](http://antiqa.biz/fotka/1243.jpg)
Oshirma xamirdan rogaligimiz tayyor. Yoqimli ishtaha!
Manba: Ayol.uz
|